Leso Minggu Bon te Enamn (16 Februari 2025, Ntaung C)
(Yer 17:5-8; Msmr;1Kor 15: 12.16-20; Bait PI Luk. 6:23ab; Luk. 6:17, 20-26)
Réis (Salam)
1
Endé-ema, asé-ka’é, wan koé étan tu’a, sanggén taung ata uwa, anak koé, ro’éng de Morin ata momang Mori Yesus agu ata momang Liha. Mai ngaji néténg bari tité kamping Jari, tikul néténg minggu kudut rinduk nipu wintuk. Séngét reweng newes te pélét mosé léwé oné mai hi Ema Mésé.
2
Kéot, nendep, mendo oné mosé dité (Masalah)
Do ata toé noingn ka’éng lino ho’o. Mosén ciri ného mendo. Wajo le deming mberes run kanang. Ca tandan mberes ditét manusia hitu bora. Maik bora hitu pangga ata te toé deming agu imbi Morin. Hitu taé de Morin oné bacang Injil. Mberes ného nian itét manusia toé mangan ngancéng célung mberes de Morin. Maik do ata toé deming Morin. Hituy séngét lite oné bacang te can. Koném mberes dité toé ngancéng ciho ko céla oné mai mata. Itu tara rantang kétan mata lite. Co’oy mosé du poli mata? Séngét lite oné bacang te suan te hi Kristus poli to’o agu mosé kolé oné mai mata.
3
Salang gérak oné reweng de Morin (Jalan Terang Sabda Tuhan)
Deming agu imbi Morin ko manusia? Hituy icin bacang te can ata emi oné mai Kitab Nabi Yeremia. Bo tu’ung, ité tara mangad oné tana lino; wajo le manusia haéd. Maik pu’u mésén mosé dité oné Morin. Landing hitu deming agu imbi ga Morin be lé agu be éta mai sanggéd. Pangang ga Mori Ngaran. Néka pangang situt manga wa ranga ata ngancéng hena le mata. Landing hitu hi Nabi Yeremia téing rapang: manusia hiot deming mberes run, cama ného rami agu remang ata todo oné satar ngkerang. Toé manga wécak wélan, toé manga ntewar wuan. Maik manusia hiot deming agu imbi Morin cama ného haju hiot todo lupi waé. Waké caler nggéré wa, saungn bémbang nggéré éta. Wécak wélan, ntewar kéta wuan.
4
Deming Morin, roés mosé. Deming manusia, mangan mata. Rantang lité mata. Co’oy cakan lité mata? Santu Paulus oné surakn te can latang te roéng serani oné Korintus wéwa kamping ité te hi Kristus hitu ata ngaso ata to’o wa mai boan. Maik manga ata toé imbin te hi Kristus to’o wa mai boan. Ata tu’ungn, Mori Yesus pu’un mosé tédéng lén. Hia pandé radak mata. Na’a nggéré wa. Rongkas boa. Kudut wé’é oné mosé tédéng lén.
5
Bolo mai mosé agu mata, ngoéng bora ko lénggé? Sanggén manusia dédék le agu oné boras le Morin. Maik manga ata siot nanang kawé bora pandé lénggé ata iwon. Isé becurs, maik manga ata darem. Isé situt lénggé agu darem paéng Adak de Mori Keraéng. Ai ata bora, woko haéng bora, hiang boran situ. Og hémong Morin. Itu tara calang moséd isét bora. Hitu bao taé run Mori Yesus oné bacang Injil. Bora toé manga da’atn maik néka redé laing ata kudut haéng agu paéng bora. Bora situ paka ciri redé kudut cumang Morin. Ciri létang te pandé mosé ata do.
6
Pedé de Morin oné mai rewengN Leso Ho’o (Pesan dari Sabda Tuhan Hari Ini)
Apa pedé de bacang leso minggu ho’o kamping ité?
7
Te can, deming agu imbi Morin. Ai mberes de manusia manga dopon. Mberes de Mori Wowo toé dopoy. Hia pandé lor agu bombong sanggéd mosé data do.
8
Te suan, koném mberesn manusia. Maik Hia toé manga ngancéng hésing agu cakan liha mata. Wakén imbi dité te hi Kristus pandé radak agu na’a wa Liha mata. Kudut randang agu langkas nawa mosé de manusia. Imbi oné Mori Yesus ngong noing te mata hitu cama ného loas oné mosé weru. Ai hi Kristus karong ité oné mosé weru hitut tédéng lén.
9
Te telun, bora hitu ciri ca deming agu imbi de manusia oné lino ho’o. Maik le kolang kawé bora, do ata situt pandé lénggé agu darem ata do. Le momang bora, do ata hémong Mori Sombang. Bora hitu pu’un oné mai Morin. Landing hitu bora paka ciri salang te cumang Morin agu te momang agu campé haé ata.
Cemol agu rekok (penutup)
Oné randang Ekaristi ité deming Morin, ai Hia deming itéy. Hia mai cumang itéy. Oné Ekaristi, Yesus Kristus ata pola to’o wa boa pati agu téing weki agu daraN latang te sanggén ité. Toé pili wulun Liha ata, bora ko lénggé, cedek ko bongotn, asé-ka’é dité taung. Oné Ekaristi, mangan célung agu caling: manusia deming Morin, ata mata ciri mosé, ata lénggé ciri bora. Kudut haéng mosé tédéng lén. Amén
Ruteng, 15 Februari 2025
Tuang Inosensius Sutam