PUISI
Oleh: Rm. Inosensius Sutam
Pilkada pandé salang kudut langkas nawa, ko….pandé calang kudut mbasak nawa
Pilkada pandé salang kudut rangkang ka’éng tana, ko…. pandé calang kudut radak ka’éng tana
Pilkada pandé salang kudut wénggos ka’éng béo, ko…. pandé calang kudut mbékot ka’éng béo
Pilkada pandé salang kudut léros lonto léok, ko…. pandé calang kudut wéntong lonto léok
Pilkada pandé salang kudut ra’um ka’éng mbaru, ko…. pandé calang kudut rasung ka’éng mbaru
Pilkada pandé salang kudut riwok ka’éng kilo, ko…. pandé calang kudut timpok ka’éng kilo
Pilkada pandé salang kudut nggelis oné weki, ko…. pandé calang kudut pengki oné weki
Pilkada pandé salang kudut nggalas wakar, ko… pandé calang kudut da’at oné wakar
Pilkada pandé salang kudut ngalis nai, ko… pandé calang kudut rabi nai
Pilkada pandé salang, kudut nanang haé ata, ko… pandé calang, kudut rangkat haé ata
Pilkada pandé salang kudut kapu ha’é wa’u, raés asé-ka’é
ko…pandé calang kudut pampung haé wa’u, raék asé-ka’é
Pilkada pandé salang kudut indang anak-wina, momang ana krona
ko… pandé calang kudut cikat anak wina, poka ana krona
Pilkada pandé salang, kudut pandé mo’éng agu mosé ro’éng le roés agu loréng
ko… pandé calang, kudut pandé kosé agu copél ro’éng wajol lopét agu lowér
Pilkada pandé salang, kudut ola bora conda rowa disét boat agu mosé capur bokak
ko… pandé calang, kudut kolang bora pandé rowa isét boat agu mosé capur bokak
Pilkada pandé salang kudut rombéng mosé, ko pandé calang kudut longké mosé
Pilkada pandé salang, kudut pandé uwa haé mukang, mut ha’é lumpung
ko…. pandé calang, ai pandé munda haé mukang, rutu haé lumpung
Pilkada pandé salang, kudut kékép agu pélét ata méséd agu léwéd, ninik ata jiri agu cirid
ko… pandé calang, kudut kékép agu pélét séng pandé lénggé, ninik ringgi pandé ringing tis
Pilkada pandé salang, kudut loléngs ata moséd, tadang oné mai ata matad
ko… pandé calang, ai nanang ata matad, okés ata moséd (nanang jarang mata, oké jarang mosé)
Pilkada pandé salang, kudut sakas ata mangkang agu rapakd oné ka’éng cama,
ko… pandé calang, ai pampangs agu rampas ata mangkang agu rapakd, ka’éng cama
Pilkada pandé salang, kudut lumung luju mu’u te pu’ungn curup ata pukul sanggéd ruku
ko… pandé calang, kudut dundung agu curu cungkut sanggéd ruku, landing mu’u rukus
Mai ga ité…
Ngaji agu Jari, sawal agu Ngaran, kéng agu Dédék, tombo agu Wowo…
Pandé randang pili adak ka’éng tana, kudut manga salang pandé rangkang
Pandé raés pili amé, kudut ambé agu rambéng ka’éng tana Nuca Lalé
Pandé kais pili laki ko wai, kudut ambi, rani nai, main dani tana Manggarai
Kudut sembong tana serong disé empo, kudut lendarn tana letang disé ema,
Kudut lerén tana pedé disé endé, kudut mbaék tana mbaté disé amé
Ruteng, Agustus-September 2015
Puisi lima tahun lalu. Sudah ada pada buku kumpulan puisi Manggarai, CA LELENG DO, DO LELENG CA.
